"ഈ ബ്ലോഗ് വിൽപ്പനക്ക്...!! "

Friday, December 31, 2010

ആരോഗ്യ മന്ത്രി നീണാള്‍ വാഴട്ടെ..!!


ആരോഗ്യ മന്ത്രിയുടെ വീട് മോടി പിടിപ്പിക്കാന്‍ മാത്രം അഞ്ച് കൊല്ലത്തിനിടയില്‍ 24.32 ലക്ഷം രൂപ പൊടിപൊടിച്ചു..തൊട്ടു പുറകെയുണ്ട് മന്ത്രി സുരേന്ദ്രന്‍ പിള്ള, 23,70,350 രൂപ അടിച്ചു പൊളിച്ചുകൊണ്ട് .  വേറെയുമുണ്ട് മന്ത്രിമാര്‍ പുറകെ..

മേലോട്ട് നോക്കിയാല്‍ ആകാശം മുട്ടെ ഫ്ളക്സ് ബോര്‍ഡുകളും കീഴോട്ട് നോക്കിയാല്‍ പൊട്ടിപ്പൊളിഞ്ഞ പി.ഡബ്ള്യു റോഡും മാത്രം കണ്ട് ശീലിച്ച്‌ ദിവസവും കടത്തിണ്ണകളില്‍ കിടന്നുറങ്ങി നേരം വെളുപ്പിക്കുന്ന, വെറും ഒരു വോട്ടിന്‍റെ മാത്രം വിലയുള്ള ആയിരക്കണക്കിന്‌ പട്ടിണി പാവങ്ങള്‍ തെണ്ടിത്തിരിഞ്ഞ് നടക്കുമ്പോളാണ്‌ മന്ത്രിമന്ദിരങ്ങളില്‍ ആഢംഭരത്തിന്‍റെ അഴിഞ്ഞാട്ടം നടക്കുന്നത്.

സാധാരണക്കാരായ ആപ്പയും ഊപ്പയുമൊക്കെ പന്നിപ്പനിയും എലിപ്പനിയും പട്ടിപ്പനിയും പട്ടിണിപ്പനിയും പുഴുക്കടിയുമൊക്കെ വന്ന് മരുന്നും ഡോക്ടര്‍മാരുമില്ലാത്ത സര്‍ക്കാരാശുപത്രികളില്‍ ക്യൂ നിന്ന് നിന്ന് തുള്ളി വെള്ളം വരാത്ത വാട്ടര്‍ അതോറിറ്റിയുടെ തുരുമ്പെടുത്ത പൈപ്പില്‍ നക്കി നക്കി വീണ്‌ ചാവട്ടെ..

അറ്റകുറ്റപ്പണികള്‍ക്കായി മുഖ്യമന്ത്രി ആകെ ചിലവാക്കിയത് 5,41,391 രൂപയാണ്‌. ഈ ഇനത്തില്‍ ഏറ്റവും കുറവ് തുക (67,508 രൂപ) ചിലവഴിച്ച റവന്യു മന്ത്രിയെ എന്തുകൊണ്ട് ഇവരൊന്നും മാതൃകയാക്കുന്നില്ല..??

താമസ സ്ഥലത്തിന്‍റെ അറ്റകുറ്റപ്പണികള്‍ പാടില്ല എന്നുദ്ദേശിക്കുന്നില്ല. പക്ഷെ ഒരു വീടിന്‍റെ മിനുക്ക് പണികള്‍ക്കായി മാത്രം കാല്‍ക്കോടിയോളം രൂപയുടെ ആഢംഭരം ഒരു ജനകീയ മന്ത്രിക്ക് ഭൂഷണാമാണോ..??

Tuesday, December 28, 2010

ഹമ്പട ശ്രീനിജാ...!!

2006ല്‍ നിയമസഭയിലേക്ക് മല്‍സരിക്കുമ്പോള്‍ യൂത്ത് കോണ്‍ഗ്രസ് നേതാവ് ശ്രീനിജന്‌ സ്വന്തമായി ഒരു തുണ്ട് ഭൂമിപോലും ഇല്ലായിരുന്നു.. കേവലം നാല്‌ വര്‍ഷങള്‍ക്ക് ശേഷം പലയിടത്തായി കോടിക്കണക്കിന്‌ രൂപയുടെ വസ്തു വകകള്‍..! അലാവുദ്ദീനും അല്‍ഭുത വിളക്കും പോലെ അവിശ്വസനീയം..!!

ആള്‌ ചില്ലറക്കാരനൊന്നുമല്ല. മുന്‍ സുപ്രീം കോടതി ചീഫ് ജഡ്ജിയും, ഇപ്പോള്‍ ദേശീയ മനുഷ്യാവകാശ കമ്മീഷന്‍ ചെയര്‍മാനുമായ ഒരു വ്യക്തിയുടെ മകളുടെ ഭര്‍ത്താവാണ്‌. പിന്നെ എന്ത് വേണം..!!

2G സ്പെക്ട്രം അഴിമതിയുമായി ബന്ധപ്പെട്ട് കൊടും അഴിമതി വീരന്‍ മുന്‍ കേന്ദ്ര മന്ത്രി എ.രാജയെക്കുറിച്ച് മുന്‍പ് ചീഫ് ജസ്റ്റിസിനയച്ച കത്തില്‍ മന്ത്രിയുടെ പേര്‌ പരാമര്‍ശിച്ചിരുന്നില്ല എന്ന് ഈ ജഡ്ജിയും, അല്ല പേരുണ്ടായിരുന്നു എന്ന് മറ്റൊരു ജഡ്ജി ഗോഖലെയും തമ്മില്‍ ഇടക്ക് ഭിന്നാഭിപ്രായങ്ങള്‍ ഉണ്ടായതും ശ്രദ്ധേയമാണ്‌...!!  എവിടൊക്കെയോ എന്തൊക്കെയോ കരിഞ്ഞ് മണം വരുന്നുണ്ടോ...!!

വോട്ടിന്‌ വേണ്ടി മാത്രം രാഷ്ട്രീയക്കാര്‍ ചിരിച്ച് കാട്ടുന്ന രാജ്യത്തിന്‍റെ മൊത്തം ജനസംഖ്യയില്‍ മറ്റൊരു പുണ്ണാക്കിനും കൊള്ളാത്ത 45 ശതമാനത്തോളം വരുന്ന പരമ ദരിദ്രവാസികള്‍ ഒരു ദിവസം ഒന്ന് ഇരുട്ടി വെളുപ്പിക്കാന്‍ സ്വന്തം ജീവിതത്തോട് മല്ലടിച്ച് പെടാപാട് പെടുമ്പോളാണ്‌ ശ്രീനിജന്‍മാര്‍ രാഷ്ട്രീയവും അല്ലാതെയുമുള്ള ഉന്നത ബന്ധങ്ങള്‍ മുതലാക്കി നിമിഷ നേരം കൊണ്ട് കോടികള്‍ സമ്പാദിച്ച് കൂട്ടുന്നത്..

ഈ ശ്രീനിജന്‍ നേതാവിനെ വരുന്ന തിരഞ്ഞെടുപ്പില്‍ കൂടി നിര്‍ത്തി ജയിപ്പിച്ച് ഭരണത്തില്‍ എത്തിച്ചാല്‍ ഒരു കസറ് കസറിയേനെ ഈ പുള്ളി.. പാര്‍ട്ടിക്കാര്‍ ശ്രദ്ധിച്ചാല്‍ കൊള്ളാമായിരുന്നു..

Monday, December 27, 2010

കുടിയന്‍മാരേ സലാം...!!


മുഴുക്കുടിയന്‍മാര്‍ക്കൊരു മഹാ രാജ്യമുണ്ടെങ്കില്‍ അത് ചാലക്കുടിയാണ്‌.. ചാലക്കുടിയാണ്‌ എന്ന് രണ്ടാവര്‍ത്തി ആലോചിക്കാതെ ഏത് കുടിയനും വാളുവെയ്ക്കാതെ സമ്മതിക്കും..

മുന്‍കാല ആഘോഷ വേളകളെ പോലെ ഈ ക്രിസ്ത്‍മസ് അവസരത്തിലും ഏറ്റവും കൂടുതല്‍  കുടിച്ച് മത്തന്‍മാരായി വാളുവച്ച് ആഘോഷിച്ചത് ചാലക്കുടിക്കാര്‍ തന്നെ....

ചാലക്കുടിക്കാരെ സലാം...!!

കുടിയന്‍മാരുടെ പഷ്ണി കിടക്കുന്ന കുഞ്ഞു കുട്ടി ഭാര്യമാരെ.. നിങ്ങള്‍ പട്ടിണി കിടക്കുക..... അവന്‍ നിങ്ങളോട് കൂടെ ഉണ്ടാകും...

Wednesday, December 22, 2010

മലയാളം ഡിക്ഷ്ണറി പരിഷ്കരിച്ചത്; ജയരാജ കാണ്ഡം..!!




ശുംഭന്‍, പുല്ല് വില തുടങ്ങിയ വാക്കുകള്‍ അത്ര മോശമല്ലെന്നും ഇത്രയും അന്തസ്സുള്ള വാക്കുകള്‍ ഭൂമി മലയാളത്തില്‍ വേറെ ഇല്ലെന്നും ശ്രീ. ജയരാജന്‍ കോടതിയലക്ഷ്യ കേസുമായി ബന്ധപ്പെട്ട് പ്രസ്താവിച്ചിരിക്കുന്നു.

കൊഞ്ഞാണന്‍, ആപ്പ ഊപ്പ, ഊച്ചാളി, കണാകുണാ, ശപ്പന്‍, ഓച്ചന്‍, കോപ്പന്‍, പോഴന്‍, കൂതറ, പാഷാണത്തില്‍ കൃമി തുടങി മഹോത്തരമായ സാംസ്കാരിക മലയാള പദങ്ങള്‍ക്ക് പ്രത്യേക പദവി അനുവദിച്ച് കിട്ടണമെന്നും, ഇത്തരം വാക്കുകള്‍ ഒരു വ്യക്തിയെ ലക്ഷ്യമാക്കി പ്രയോഗിച്ചാല്‍ ആ വ്യക്തി പൊതുജന മധ്യത്തില്‍ ബഹുമാന്യനും സര്‍വ്വാദരണീയനും സംഭൂജ്യനും ആയിത്തീരുമെന്നും അതിനാല്‍ ഇത്തരം വാക്കുകള്‍ ഉപയോഗിക്കുന്ന സല്‍ഗുണ സമ്പന്നരെ കോടതിയെന്നും അലഷ്യമെന്നും ഒക്കെ പറഞ്ഞ് വെറുതെ ബുദ്ധിമുട്ടിക്കരുതെന്നും താഴ്മയായി അപേക്ഷിക്കുന്നു. കൂടാതെ ഇനി മുതല്‍ "എടാ ശുംഭാ" എന്നാല്‍ അല്ലയോ മഹാനുഭവാ എന്നും "പോടാ പുല്ലെ" എന്നാല്‍ ഉല്‍കൃഷ്ട ശ്രേഷ്ഠനായ പുണ്യ നിന്തിരുവടികള്‍ വിടവാങ്ങിയാലും എന്നും മാറ്റി വായിക്കുവാന്‍ ശ്രദ്ധിക്കുമല്ലൊ..? (അവലംബം: ജയരാജ ഡിക്ഷ്ണറി)


Saturday, December 18, 2010

ഞങ്ങളില്ലാതെ (ഞങ്ങള്‍ക്കില്ലാതെ) എന്താഘോഷം...!!!


രാവിലെ മുതല്‍ തന്നെ ചില വിദ്വാന്‍മാരൊക്കെ മൂക്കറ്റം (നാടനാണോ.. വിദേശിയാണോ..???) സേവിച്ചിട്ടാണു നിയമസഭയില്‍ വരുന്നതെന്ന് ആരോഗ്യ മന്ത്രി ശ്രീമതിടീച്ച‍റുടെ പ്രസ്താവന ഭരണ പ്രതിപക്ഷ ഭേദമന്യ സഭയില്‍ ഒച്ചപ്പാടുണ്ടാക്കിയെന്ന് വാര്‍ത്ത.
ബിവറേജസിനു മാസം തോറും ഭണ്ഡാരം നിറയെ ലാഭം വന്നു കേറുന്നത് പിന്നെ എങ്ങിനെ എന്നാ മന്ത്രി കരുതിയത്.
ട്രാഫിക് പോലീസു കാരുടെ കൈയ്യില്‍ ഇരുന്ന് ഊതാതെ തന്നെ ചുമ്മ ഊത്ത് കേള്‍ക്കുന്ന ഊത്ത് മെഷീന്‍ ഒരെണ്ണം സംഘടിപ്പിച്ച് നിയമ സഭാ കവാടത്തില്‍ ഫിറ്റ് ചെയ്താല്‍ അതോടെ തീരുന്ന പ്രശ്നമേ ഉള്ളൂ.
അകത്തോട്ട് കേറുമ്പഴും പുറത്തേക്കിറങ്ങുമ്പഴും എല്ലാ എമ്മല്ലേമാരും അതിലൊന്ന് ഊതിയിട്ട് പൊയ്ക്കോട്ടെ.. ഒരു പുതിയ മാറ്റത്തിന്റെ തുടക്കമാകട്ടെ.. 
ഊതിയാല്‍ ശബ്ദം വരാതിരിക്കാന്‍ മെംബര്‍മാര്‍ക്കൊക്കെ ഒരു ട്രയിനിംഗ് വേണമെങ്കില്‍ പരിചയ സമ്പന്നരായ പോലീസുകാരോട് ചോദിച്ചാല്‍ അവരു കാണിച്ചു തരും അടവുകള്‍.. പോലീസെത്ര ലാത്തി കണ്ടിരിക്കുന്നു.. ലാത്തിയെത്ര പോലീസിനെ കണ്ടിരിക്കുന്നു...

ഞങ്ങളില്ലാതെ (ഞങ്ങള്‍ക്കില്ലാതെ) എന്താഘോഷം...!!!

Thursday, December 16, 2010

ഇതെന്താ വെള്ളരിക്കാ പട്ടണമോ...?


ഇപ്പോള്‍ മനസ്സിലായോ ഡോക്ടര്‍ സാറെ.. മന്ത്രിക്കിട്ട് പണിഞ്ഞാല്‍ പണി പാളുമെന്ന്...??

പിന്നെ ഡോക്ടര്‍ക്ക് സസ്പെന്‍ഷന്‍ അടിച്ചു കൊടുത്തതോടെ മന്ത്രീടെ അടക്കാനാകാത്ത ക്ഷോഭം കെട്ടടങ്ങിയെങ്കില്‍ സമാധാനമായി. മന്ത്രിമാര്‍ക്കും നേതാക്കന്മാന്‍ക്കുമെതിരെ പ്രതികരിക്കാനിരിക്കുന്ന മുഴുവന്‍ കൊഞ്ഞാണന്‍മാരെയും ഇതിനാല്‍ തെര്യപ്പെടുത്തുന്നതെന്തെന്നാല്‍ ഈ വെള്ളരിക്കാ പട്ടണം ഭരിച്ചുകൊണ്ടിരിക്കുന്നതും ഇനി ഭരിക്കാന്‍ വെമ്പല്‍ കൊണ്ടിരിക്കുന്നതുമായ സകല പുണ്യമഹാ സമ്പൂജ്യ പുംഗവ തിരുവടികളും പൊതു ജനമെന്ന കൊഞ്ഞാണന്‍‍മാര്‍ക്ക് അതീതരാണെന്നും കഞ്ഞാകുഞ്ഞാ വല്ലതും പറയുകയോ എഴുതുകയോ ചെയ്യുന്ന സകല ലവന്‍മാരെയും മേല്‍പ്പടി തിരുവടികള്‍ രായ്ക്ക് രാമാനം ഇതുപോലെ നാടുകടത്തിക്കളയുമെന്നും മനസ്സിലാക്കിക്കൊള്ളുക..!!


Wednesday, December 8, 2010

സര്‍ക്കാര്‍ നിയമന തട്ടിപ്പ് ചരിതവും വിക്കീലിക്സും..!!


അമേരിക്കയുടെ സൈനിക നയതന്ത്ര രഹസ്യങ്ങള്‍ അങ്ങാടിയില്‍ പരസ്യമാക്കിയ വിക്കീലിക്സ് (കേള്‍ക്കുമ്പോള്‍തന്നെ എന്തോ എവിടെയോ ലീക്ക് ചെയ്യുന്നപോലെ) സ്ഥാപകന്‍ ജൂലിയാന്‍ അസാന്‍‍ജിനെ വേറൊരു കേസില്‍ പ്രതിയാക്കി ലണ്ടനില്‍ അറസ്റ്റ് ചെയ്യിക്കാന്‍ അമേരിക്കയുടെ സമ്മര്‍ദ്ദം ഫലം കണ്ടു.
ഇല്ലായിരുന്നെങ്കില്‍ അമേരിക്കയുടെ ഉറക്കം കെടുത്തുന്ന എന്തൊക്കെ അയാള്‍ ഇനീം വിളിച്ചു പറഞ്ഞേനെ..
അമെരിക്ക തന്നെ ലോക പോലീസ് എന്ന് ഒരിക്കല്‍ കൂടി തെളിയിച്ചു.

ഉമ്മന്‍‍ചാണ്ടിയും ചെന്നിത്തലയും മുന്‍കൈയ്യെടുത്ത് ഇയ്യാളെ ഒരാഴ്ചത്തേക്ക് കേരളത്തില്‍ ഇറക്കിയാല്‍ ഇപ്പോള്‍ പുകഞ്ഞുകൊണ്ടിരിക്കുന്ന സര്‍ക്കാര്‍ നിയമന ചരിതം തട്ടിപ്പ് മുഴുവന്‍ ഭാഗവും ഇയ്യാള്‍ തോണ്ടി പുറത്തിട്ടു തന്നേനെ..

Tuesday, December 7, 2010

അനിയന്‍ ബാവ.. ചേട്ടന്‍ ബാവ..!!

പാര്‍ട്ടിയുടെ തലപ്പത്തെത്തിയ പുതിയ അനിയന്‍ ബാവ മൈക്ക് വെച്ച് കെട്ടി പറഞ്ഞ് പറഞ്ഞ് ചേട്ടന്‍ ബാവയുടെ ലാവ്‍ലിന്‍ പാത്രത്തിലും കൈയിട്ട് ഒരിളക്കിളക്കി; പിന്നെ ചേട്ടന്‍ ബാവ തിരിഞ്ഞും മറിഞ്ഞും നോക്കിയില്ല.കിട്ടാവുന്നിടത്തൊക്കെ വച്ച് അനിയന്‍ ബാവയേയും പാര്‍ട്ടിയേയും ചുവന്ന നാടന്‍ കോഴിയുടെ മുട്ട പൊട്ടിച്ച് ഓം‍ലറ്റ് അടിക്കുന്ന പോലെ തിരിച്ചും മറിച്ചും അടിച്ചു പരത്താന്‍ വെമ്പല്‍ കൊണ്ടിരിക്കുമ്പോള്‍ അതാ വരുന്നു.. സര്‍ക്കാര്‍ നിയമന തട്ടിപ്പും, കൈക്കൂലിയും കോഴയും വ്യാജ അഡ്‍വൈസ് മെമോയും അനിയന്‍ ബാവ പാര്‍ട്ടിയുടെ ജോയിന്‍റ് കൗണ്‍സില്‍ ബന്ധവും എല്ലാം കൂടി ഒരു ഉഗ്രന്‍ കോള്‌. ഇനി കുറെ നാളത്തേക്ക് ലാവ്‍ലിനില്‍ ഇട്ട് ചൊറിയാനുള്ള അനിയന്‍ ബാവയുടെ വായടപ്പിക്കാന്‍ ചേട്ടന്‍ ബാവക്ക് വേറെ എന്തെങ്കിലും വേണോ..?? വെച്ചലക്കിക്കൂടെ...

ഇത് കേരളമെന്നൊരു പ്രദേശമാണെന്നും, ഇവിടെ കുറെ മനുഷ്യര്‍ ഉണ്ടെന്നും, അവരെല്ലാം വെറും വായില്‍ നോക്കികളല്ലെന്നും, സകല കാര്യങ്ങളിലും ജാഗരൂകരായി കണ്ണും കാതും കൂര്‍പ്പിച്ചിരിക്കുകയാണെന്നും ആരും മറന്ന് കളയരുതേ...

Thursday, November 25, 2010

ഇതു താന്‍ടാ പോലീസ്



ഇന്നത്തെ ഒരു പത്ര വാര്‍ത്ത വായിച്ച് നമ്മുടെ പോലീസിന്‍റെ കേരളത്തില്‍ വിലസുന്ന തീവ്രവാദികളുടെ കാര്യത്തിലുള്ള ജാഗ്രതയില്‍ ഞാന്‍ കോരിത്തരിച്ചിരുന്നു പോയി..

വാര്‍ത്ത ഒന്ന്:
വിഴിഞ്ഞത്ത് കടലില്‍ ബോട്ട് തട്ടിയെടുത്ത സംഘം നീണ്ടകരയില്‍ പോലീസ് പിടിയിലായി.

വാര്‍ത്ത രണ്ട്:
പരപ്പനങ്ങാടി കടപ്പുറത്ത് ഹെലികോപ്റ്ററില്‍ നിന്ന് തൂങ്ങിയിറങ്ങിയ രണ്ട് തീവ്രവാദികളെ നാട്ടുകാര്‍ ഓടിച്ചിട്ട് പിടിച്ച് പോലീസിലേല്‍പ്പിച്ചു.

വാര്‍ത്ത മൂന്ന്:
കണ്ണൂര്‍ ഇടക്കാട് തോണിയില്‍ വന്നിറങ്ങിയ രണ്ട് തീവ്രവാദികളെ കടലോര ജാഗ്രതാ സമിതി പ്രവത്തകര്‍ പിടിച്ച് പോലീസിനു കൈമാറി.

വാര്‍ത്ത നാല്‌:
ബേപ്പൂര്‍ തീരത്ത് സംശയാസ്പദമായി ബോട്ടിലെത്തിയ രണ്ട് പേരെ പോലീസ് പിടികൂടി.

ഹൊ.. ഇതെല്ലാം ഒറ്റ ദിവസം..
ദേശസ്നേഹമുള്ള ഒരു മലയാളിക്ക് സ്വന്തം പോലീസിനെക്കുറിച്ച് അഭിമാന രോമാഞ്ച കഞ്ചുകമുണ്ടാകാന്‍ ഇതില്‍ കൂടുതല്‍ ഇനിയെന്തു വേണം.. ഇതു താന്‍ടപോലീസ്..
ദിവസേന ബാലികാ പീഠനവും ബലാല്‍സംഗവും കൊലപാതകവും മോഷണവും പിടിച്ചു പറിയും വായിച്ച് വായിച്ച് ഇക്കിളിയിട്ടിരിക്കുമ്പോള്‍ (ദിവസ‍വും ഈമാതിരി ചൂട് വാര്‍ത്തകളില്ലാത്ത ഒരു പത്രത്തെക്കുറിച്ച് ഇപ്പൊഴത്തെക്കാലത്ത്
ചിന്തിക്കാനെ വയ്യ) ദേണ്ടെടാ ഉവ്വേ നമ്മുടെ പോലീസിന്‍റെ വീര ചരിതങ്ങള്‍ തെക്കറ്റം മുതല്‍ വടക്കറ്റം വരെ നുരഞ്ഞു പൊന്തുന്നു.. ഇതെന്തു പറ്റി പോലീസിനൊരു പുതിയ ഉണര്‍വ്.. കൊടിയേരി മന്ത്രി പോലീസുകാര്‍ക്കെല്ലാംകൂടി
മുസ്‍ലി പവര്‍ എക്സ്ട്ര വല്ലതും റേഷനായി കൊടുത്ത് തുടങ്ങിയൊ..??
ബാക്കി വാര്‍ത്ത നിങ്ങളുതന്നെ വായിക്ക്..
 (വെള്ളെഴുത്തുള്ളവര്‍ ക്ളിക്കി വലുതാക്കി വായിക്കണം)

ഇതൊക്കെ പാവപ്പെട്ട ജനത്തിനെ പറ്റിക്കാനുള്ള അഭ്യാസമായിരുന്നു പോലും.. അതല്ലെ ഞാനും അതിശയിച്ച് പോയത്..
ഈ പോലീസിനെന്ത് പറ്റിയെന്ന്..
അങ്ങിനെ പോലീസ് തുറന്ന് വിട്ട തീവ്രവാദി ഭൂതങ്ങളെയെല്ലാം പോലീസ് തന്നെ പിടിച്ച് കുപ്പിയലടച്ച് ഒറിജിനല്‍ തീവ്രവാദികള്‍ക്ക് ഏതെല്ലാം വഴികളിലൂടെല്ലാം വന്നുകൂടാ എന്ന് മുന്നറിയിപ്പും കൊടുത്തു.
ഇനിമുതല്‍ കേരളത്തിലേക്ക് നുഴഞ്ഞുകയറാനുദ്ദേശിക്കുന്ന തീവ്രവാദികള്‍ വിവരം മുന്‍കൂര്‍ പോലീസില്‍ അറിയിച്ചാല്‍ വീണ്ടും ഒരു മോക്ക് ഡ്രില്‍ നടത്തി പോലീസുകാര്‍ സ്വയം സായൂജ്യമടയുന്ന തക്കം നോക്കി നിങള്‍ക്ക് മറുവഴിയിലൂടെ ഇടിച്ച് കയറാവുന്നതാണ്‌..
(വൃത്തിയുള്ള പോലീസുകാര്‍ ക്ഷമിക്കുക)



Saturday, November 20, 2010

വണ്ടി മന്ത്രി സിനിമയില്‍ തകര്‍ക്കുന്നു.. യാത്രക്കാര്‍ പെരുവഴിയില്‍ അലയുന്നു...


നഷ്ടത്തിലോടുന്ന "ആനവണ്ടി" യിലെ ജോലിക്കാര്‍ക്ക് ശംമ്പളം കൊടുക്കാനുള്ള കാശുണ്ടാക്കാനാണോ വണ്ടി മന്ത്രി സിനിമയിലഭിനയിക്കാന്‍ പോകുന്നത്..??

ശബരിമല തീര്‍ഥാടകര്‍ക്ക് ആവശ്യത്തിനുള്ള വാഹന സൗകര്യം ഉണ്ടാക്കാന്‍ വകുപ്പിനും വകുപ്പ് മന്ത്രിക്കും കഴിഞ്ഞില്ല എന്ന വാര്‍ത്ത വായിച്ചു തീര്‍ന്നില്ല, ദേ വരുന്നു പിന്നാലെ വകുപ്പ് മന്ത്രി സിനിമയില്‍ കണ്ടക്ടറായി അഭിനയിച്ചു കളിക്കുന്ന പടം അടിച്ചു വരുന്നു. ഭരിക്കാന്‍ പിന്നെ എവിടുന്നു സമയം കിട്ടാനാ..??

അതോ മന്ത്രിക്ക് വകുപ്പില്‍ ഭരിക്കാനുള്ള സംഗതികളൊന്നും കിട്ടുന്നില്ലേ? എന്തായാലും അല്ലയോ മുഖ്യ മന്ത്രീ , അങ്ങയുടെ വണ്ടിയില്‍ കയറിയിരിക്കുന്ന പണിയൊന്നുമില്ലാത്ത മന്ത്രിമാരെ സിനിമയിലോ, സര്‍ക്കസിലോ അഭിനയിക്കാന്‍ വിടുന്നതാണ് നാട്ടുകാര്‍ക്ക് നല്ലത്. ജനങ്ങളുടെ ചിലവില്‍ മന്ത്രിമാരായിട്ട് ഇതൊക്കെ അനുവദിച്ചു കൊടുക്കണോ?

"mother promise my machoo, delivered mother can't afford this" "അമ്മച്ചിയാണേ മച്ചൂ പെറ്റ തള്ള സഹിക്കൂല്ല.." (ഡയലോഗും വിവര്‍ത്തനവും മറ്റൊരു ബ്ളോഗറോട് കടപ്പാട് )

ഗട്ടര്‍: ആരോഗ്യ മന്ത്രിക്ക് ടോക്ടറായും, എക്സൈസ് മന്ത്രിക്ക് കള്ളു കുടിയനായും, പോലിസ് മന്ത്രിക്ക് ഗുണ്ടയായും സിനിമയില്‍ പരിക്ഷണ അഭിനയം നടത്തി നോക്കാവുന്നതാണ്. തിയറ്റര്‍ മുതാളിമാര്‍ "പ്രേക്ഷകര്‍ തിയറ്ററിനുള്ളില്‍ കാറിത്തുപ്പരുത്" എന്നൊരു ബോര്‍ഡ് പുറത്ത് വയ്ക്കുന്നത് നന്നായിരിക്കും..

Thursday, November 18, 2010

കൊലപാതകികളും കൊലപാതക പോലീസ് ഏമാന്മാരും ജഗ്രതൈ..

കൊടും പീഠനങ്ങള്‍ക്കിരയായി പണ്ടെങ്ങോ ദുര്‍മ്മരണപ്പെട്ട് പോയവരുടെ പ്രേതാത്മാക്കള്‍ തങ്ങളുടെ മരണത്തിനു കാരണക്കാരായ കൊലപാതകികളുടെ കള്ളി വെളിച്ചത്താക്കാന്‍ മറ്റ് ചിലരുടെ വേഷങ്ങളില്‍ വീണ്ടും ദൈവത്തിന്‍റെ സ്വന്തം നാട്ടില്‍ പുനര്‍ജ്ജനിക്കുന്നു..

പത്ത് നാല്പത് കൊല്ലങ്ങള്‍ക്ക് മുന്‍പ് പോലീസുമായിട്ടുള്ള ഏറ്റുമുട്ടലില്‍ കൊല്ലപ്പെട്ടു എന്ന് മേലധികാരികള്‍ പറഞ്ഞു പരത്തിയിരുന്ന നക്സലൈറ്റ് നേതാവ് വര്‍ഗ്ഗീസിന്‍റെ ആത്മാവ് തന്‍റെ നെഞ്ചിനു നേരെ വെടിവച്ച രാമചന്ദ്രന്‍ പോലീസിന്‍റെ ദേഹത്ത് നേരിട്ട് ആവഹനം നടത്തി സത്യം ലൊകത്തോട് വിളിച്ച് പറഞ്ഞു.. ഫലം എന്തായി.. പോലീസ് സേനയെ വിറപ്പിച്ച് ഭരിച്ചിരുന്ന പോലീസ് മേധാവി വയസ്സുകാലത്ത് ശിഷ്ഠ ജീവിതം അകത്ത് കിടക്കണം.. കാലത്തിന്‍റെ ഓരോ കളികളെയ്..

മുപ്പതില്‍ പരം വര്‍ഷങ്ങള്‍ക്ക് മുന്‍പ് കക്കയം ക്യാമ്പില്‍ പോലീസിന്‍റെ ക്രൂരമായ മര്‍ദ്ദനങ്ങള്‍ക്കൊടുവില്‍ മരണത്തിനു കീഴടങ്ങിയ രാജന്‍റെ പ്രേതാത്മാവ് ഇനി ഏത് ഉരുട്ടല്‍ പോലീസുകാരന്‍റെ ദേഹത്താണോ ആവാഹനം നടത്തി "ഞാനാണു ഉരുട്ടി കൊന്നത്.. ലവനാണു ഉരുട്ടാന്‍ പറഞ്ഞത്.." എന്നൊക്കെ വിളിച്ചു പറയാന്‍ പോകുന്നത്.. കാത്തിരുന്ന് കാണാം..

അതിനു മുന്‍പേ മരണം കാത്തിരിക്കുന്ന നേതാക്കന്മാരും, അകത്തു കിടക്കുന്നതും, പുറത്ത് വിലസുന്നവരുമായ പോലീസുകാരും സ്വന്തം ആത്മാവിന്‍റെ ശാന്തിക്ക് വേണ്ടിയെങ്കിലും രാജന്‍റെ ജഡം എന്തു ചെയ്തു എന്ന് കുറ്റസമ്മതം നടത്തി സത്യം ജനങ്ങളോട് പറഞ്ഞാല്‍ രാജന്‍റെ ആത്മാവിനെ മറ്റൊരു രാമചന്ദ്രന്‍ പോലീസിന്‍റെ ദേഹത്ത് കൂടുന്നതില്‍ നിന്ന് തടയാം.

കാത്തിരിക്കാം.. ജീവിച്ചിരിക്കുന്ന കുറ്റവാളികളുടെ മനം മാറ്റത്തിനായി.. അനേകം ആത്മാക്കളുടെ ശാന്തിക്കായി..

ഇനി സിസ്റ്റര്‍ അഭയ തുടങ്ങി ഏതെല്ലാം ആത്മാക്കള്‍ രംഗത്ത് വരാനിരിക്കുന്നു..

കൊലപാതകികള്‍ ജാഗ്രതൈ...

Tuesday, November 16, 2010

എന്‍റെ രായണ്ണാ ഇപ്പ എപ്പിടി..??




1.76 ലക്ഷം കോടി രൂപയുടെ 2G സ്പെക്ട്രം അഴിമതി പരസ്യമായി വിവാദമായിട്ടും രാഷ്ട്രീയ സമവാക്യങ്ങള്‍ രാജയുടെ രാജി ആവശ്യപ്പെടാന്‍ വൈകി.. ഒടുവില്‍ രാഷ്ട്രീയ സമ്മര്‍ദ്ദത്തിനു വഴങ്ങി അഴിമതി വീരന്‍ ടെലികോം മന്ത്രി രാജി വച്ചു..

മറ്റു ചില അഴിമതി വീര ഗാഥകള്‍...

കോമണ്‍ വെല്‍ത്ത് ഗയിംസിന്‍റെ നടത്തിപ്പിനു ശേഷം അഴിമതിയുടെ കാര്യത്തില്‍ ഇന്ത്യയുടെ പൊസിഷന്‍ ലോകത്തെ 160 അഴിമതിരാജ്യങ്ങളുടെ പട്ടികയില്‍ണ്‍പത്തേഴാം സ്ഥാനത്ത് എത്തി നില്‍ക്കുന്നു..

ആദര്‍ശ് ഫ്ളാറ്റ് വിവാദത്തിലൂടെ അഴിഞ്ഞു വീണ ആദര്‍ശത്തിന്‍റെ മുഖം മൂടി..

2008 ല്‍ ഇന്ത്യന്‍ പാര്‍ലമെന്‍റെനുള്ളില്‍ ചില അംഗങ്ങള്‍ കോഴയായി കിട്ടിയ ലക്ഷക്കണക്കിനു രൂപയുടെ  ഇന്ത്യന്‍ കറന്‍സി നോട്ടുകള്‍ വാരി വിതറി യഥാര്‍ത്ഥ ജനാധിപത്യം എന്തെന്ന് കാട്ടിത്തന്നു..

അങ്ങിനെ ഇന്ത്യ മുന്നോട്ട്.. മുന്നോട്ട്... ദീപസ്തംഭം മഹാശ്ചര്യം.. നമുക്കും കിട്ടണം പണം...

കൂടുതല്‍  RAJA അഴിമതി വായിക്കാന്‍ താഴെ ലിങ്കില്‍ ക്ലിക്കുക..
http://jgopikrishnan.blogspot.com/

Friday, November 12, 2010

എന്‍ഡോസള്‍ഫാന്‍... എന്തോ ഒരു സംതിംഗ് ഇല്ലേ..


വിഷ മഴയായി പെയ്തിറങ്ങിയ എന്‍ഡോസള്‍ഫാന്‍റെ ദുരിതങ്ങള്‍ക്ക് ഇരയായി മരിച്ച് ജീവിക്കുന്ന നൂറ് കണക്കിനു മനുഷ്യക്കോലങ്ങളെ കണ്ടിട്ടും കണ്ണുതുറക്കാത്ത ഭരണവര്‍ഗ്ഗ മേലാളന്മാരേ... നിങ്ങള്‍ര്‍ക്ക് ലാഭമുണ്ടാക്കികൊടുക്കാനാണു ഇനിയും കണ്ണടച്ച് ഇരുട്ടാക്കുന്നത്.. വേറെ എന്തോ ആണു അവിടെ പ്രശ്നം എന്ന് പറയുന്ന തോമസ് മാഷ് ഉള്‍പ്പെടുന്നവര്‍ ഈ മനുഷ്യക്കോലങ്ങളെ പോയി ഒന്ന് കാണണം..കണ്ടേ തീരൂ..
വീണ്ടും..വീണ്ടും പഠനങ്ങളും പഠനറിപ്പോര്‍ട്ടുകളും കാത്തിരിക്കുന്ന നിങ്ങള്‍ ഒരു തലമുറയുടെ മുഴുവന്‍ ശാപവും നിങ്ങളുടെ വരും തലമുറയുടെ മേല്‍ ചോദിച്ച് വാങ്ങി വയ്ക്കരുത്..അവരുടെ ശാപം നിങ്ങളുടെ കുഞ്ഞുങ്ങള്‍ക്ക് മേല്‍ ഉണ്ടാകാതിരിക്കട്ടെ..

Wednesday, November 10, 2010

അരോഗ്യ വകുപ്പും ആരോഗ്യ വകുപ്പ്‌ മന്ത്രിയും ആയുരാരോഗ്യത്തോടെ നിണാ‍ള്‍ വാഴട്ടെ..!!

അഴിമതി വകുപ്പിലെ "സോറി.. ക്ഷമിക്കണം" അരോഗ്യ വകുപ്പിലെ അഴിമതിക്ക്‌ കൂട്ട്‌ നില്‍ക്കാത്തത് കൊണ്ട് അരോഗ്യ വകുപ്പ്‌ സെക്രട്ടറി മനോജ് ജോഷിയെ തല്‍സ്ഥാനത്ത്‌ നിന്ന് മാറ്റി. (വാര്‍ത്ത 10-11-)    

12 ലക്ഷം രൂപയുടെ ആംബുലന്‍സിനു പകരം 33.5 ലക്ഷം രൂപ വീതം വിലയുള്ള 50 ആംബുലന്‍സുകള്‍ വാങ്ങുന്നതിനെയാണു ഇദ്ദേഹം എതിര്‍ത്തത്. നിലവില്‍ ഇത്തരം 19 എണ്ണം ആരോഗ്യവകുപ്പിന്റെ ആപ്പീസ് വളപ്പില്‍ ഒരു പണിക്കും വിടാതെ നിര്‍ത്തി ഇട്ടിരിക്കുകയാണു പോലും..

നന്നായി ഒന്ന് വെളിക്കിരിക്കാന്‍ ഒരു കക്കൂസു പോലും ഇല്ലാത്ത കോരന്റെയും കറുമ്പന്റെയും ആരോഗ്യകാര്യത്തില്‍ ആഢംബര ആംബുലന്‍സ് തന്നെ വേണം എന്ന വകുപ്പിന്റെ പിടിവാശി ചൊദ്യം ചെയ്യാന്‍ പാടുണ്ടായിരുന്നോ ജോഷി സാറെ..

12 ലക്ഷത്തിന്റെ വാങ്ങിയാല്‍ 33 ലക്ഷത്തിന്റെ അത്രേം കാര്യങ്ങള്‍ നടക്കുമോ..??

എന്തിനാ എന്റെ ജോഷി സാറെ ആവശ്യമില്ലാത്തിടത്ത് തലയിട്ട് പൊല്ലാപ്പാക്കാന്‍ പോയത്...??

അരോഗ്യ വകുപ്പും ആരോഗ്യ വകുപ്പ്‌ മന്ത്രിയും ആയുരാരോഗ്യത്തോടെ നിണാ‍ള്‍  വാഴട്ടെ


Wednesday, November 3, 2010

ബാലന്‍ ഒരു ബാലന്‍


ക്ലിക്കി വലുതാക്കി വായിക്കുക